कञ्चनपुरअसार १४,
सुदूरपश्चिमका चारजना विद्यार्थीले मात्रै चार जिपिए ल्याएका छन्। ०८० मा सञ्चालन भएको माध्यमिक शिक्षा परीक्षा एसइई मा सहभागी सुदूरका चारजना विद्यार्थीले मात्रै चार जिपिए ल्याएका हुन् । राष्ट्रिय परीक्षा बोर्ड परीक्षा नियन्त्रण कार्यालयले बिहीबार एसइईको नतिजा सार्वजनिक गरेको छ ।
सुदूरपश्चिम शिक्षा निर्देशनालय दिपायल डोटीको तथ्यांकअनुसार चारजना विद्यार्थीले मात्रै सर्वाधिक ग्रेट प्वाइन्ट एभरेज जिपिए ल्याएका छन् । सुदूरमा ५५ हजार १० विद्यार्थीमध्ये चार विद्यार्थीले मात्रै चार जिपिए ल्याएका हुन् ।
चार जिपिए ल्याउनेमध्ये चारैजना कैलालीका रहेका छन् । बाँकी जिल्लाका कुनै पनि विद्यार्थीले चार जिपिए ल्याउन सकेका छैनन् । एक सामुदायिक विद्यालयका विद्यार्थी र तीन निजी विद्यालयका विद्यार्थीले चार जिपिए ल्याएको निर्देशनालयको तथ्यांकमा जनाएको छ । कैलाली अत्तरियाको दुर्गालक्ष्मी माविकी छात्रा नीतिका अवस्थीले चार जिपिए ल्याएकी छिन् ।
गोदावरीको तेहरी, सत्यवादी एकेडेमी र टीकापुर वीरेन्द्र मन्दिरका विद्यार्थीले मात्रै चार जिपिए ल्याए। शिक्षा विकास निर्देशनालय दिपायल डोटीको तथ्यांकअनुसार ३३ हजार सात सय ४४ विद्यार्थीले एनजी अर्थात् ननग्रेड ल्याएका छन् । शिक्षा विकास निर्देशनालय दिपायल डोटीका निर्देशक दुर्गादत्त विष्टले बझाङको हालसम्म विवरण प्राप्त नभएको बताए ।
